बातम्या

शिवसेनेच्या जाहिरातीमुळे देवेंद्र फडणवीस यांचा कोल्हापूर दौरा रद्द झाल्याची चर्चा

By nisha patil - 6/13/2023 7:19:42 PM
Share This News:

कोल्हापूर प्रतिनिधी राज्याचे उपमुख्यमंत्री देवेंद्र फडणवीस  यांचा कोल्हापूर दौरा  रद्द झाला आहे. पालकमंत्री दीपक केसरकर यांनी ही माहिती दिली. फडणवीस यांची तब्येत ठीक नसल्याने त्यांचा दौरा रद्द करण्यात आला आहे. देवेंद्र फडणवीस यांच्याऐवजी चंद्रकांत पाटील हे कोल्हापूर दौऱ्यावर जाणार आहेत.उपमुख्यमंत्री देवेंद्र फडणवीस यांचा कोल्हापूर दौरा नियोजित होता. शासन आपल्या दारी कार्यक्रमासाठी ते मुख्यमंत्री एकनाथ शिंदे यांच्यासह कोल्हापुरात येणार होते. 
दरम्यान वृत्तपत्रात शिवसेनेने दिलेल्या जाहिरातीमुळे शिवसेना-भाजप यांच्यात धुसफूस सुरु झाल्याची चर्चा रंगली आहे. देशात मोदी, राज्यात शिंदे या मथळ्याखाली ही जाहिरात प्रसिद्ध करण्यात आली आहे. मात्र या जाहिरातीत देवेंद्र फडणवीस यांचा फोटो गायब आहे. देवेंद्र फडणवीस यांच्यापेक्षा एकनाथ शिंदेच लोकप्रिय मुख्यमंत्री असल्याचा उल्लेख जाहिरातीत करण्यात आला आहे. नव्या सर्वेक्षणामुळे शिवसेनेने भाजपला डिवचल्याचा टोला विरोधकांनी लगावला. परिणामी यामुळे भाजप नेत्यांमध्ये अस्वस्थता निर्माण होऊन शिवसेना-भाजप युतीमध्ये धुसफूस सुरु झाल्याचं म्हटलं जात आहे. यामुळे देवेंद्र फडणवीस यांनी मुख्यमंत्री एकनाथ शिंदे यांच्यासमवेत कोल्हापूरला येण्याचं टाळल्याची चर्चा रंगली आहे.