बातम्या

अखेर महापालिकेला जाग; ३० मे पूर्वीच रस्ते पूर्ण करण्याचे आदेश

By nisha patil - 5/16/2024 5:27:38 PM
Share This News:

कोल्हापूर :प्रतिनिधी कोल्हापूर शहरात रस्त्याच्या कामासाठी १०० कोटी निधीचा गाजा वाजा झाला पण प्रत्यक्षात किती आले? रस्ते कधी पुर्ण होणार? एक ना अनेक प्रश्न गुलदस्त्यात आहेत.
 

 कोल्हापूर शहरातील शंभर कोटीची रस्ते कामे रखडल्यानंतर कोल्हापूर शहर व जिल्हा नागरिक कृती समितीने आंदोलन छेडल्यानंतर आता कोल्हापूर महापालिकेला जाग आली आहे. शहरातील केवळ पाच प्रमुख रस्ते ३० मे पूर्वी पूर्ण करावेत असे आदेश बुधवारी ठेकेदारास देण्यात आले आहेत.

शहरातील १६ मुख्य रस्ते करणे बाबत महाराष्ट्र सुवर्ण जयंती नगरोत्थान महाअभियान (राज्यस्तर) शासन निधीतून १०० कोटी निधी मधून रस्ते करण्यास मान्यता झालेली असून त्या अनुषंगाने सदर कामाची वर्क ऑर्डर काढण्यात आली.
यंत्रणे अभावी कामे रखडली
सदरची वर्क ऑर्डर १४.१२.२०२३ रोजी ठेकेदारास लागू करण्या आलेली आहे. या १६ पैकी ५ रस्त्याची कामे १५ मे पूर्वी पूर्ण करण्याबाबत प्रशासक के. मंजूलक्ष्मी यांनी ठेकेदाराला आदेश दिले होते. तथापी ठेकेदाराकडे उपलब्ध असलेले यांत्रिक बळ, मनुष्यबळ तसेच मटेरिअल पाहता त्याला दिलेल्या कालावधीमध्ये तो कामे पूर्ण करु शकलेला नाही. त्यामुळे संबधित ठेकेदाराला कोल्हापूर महानगरपालिकेकडून कामाची प्रगती वाढविण्यासाठी नोटीस बजावण्यात आली आहे.

या कामांना गती यानंतर संबधित ठेकेदाराने दि. ११.०५.२०२४ रोजी पासून योग्य ते मनुष्यबळ व यांत्रिक बळ आणून कामासाठी लागणारे मटेरिअल उपलब्ध करून पूर्ण क्षमतेने काम सुरु केले आहे. या ५ रस्त्यांपैकी निर्मिती कॉर्नर ते कळंबा रोड या ५९८ मी. लांबीच्या रस्त्याचे रुंदीकरण, खडीकरण व डांबरीकरण काम पूर्ण झाले आहे. तसेच सद्यस्थितीत कोळेकर तिकटी ते नंगीवली चौक या ४०० मी. रस्त्याचे खडीकरण काम पूर्ण करून डांबरीकरण काम प्रगतीपथावर आहे. खरी कॉर्नर ते उभा मारुती चौक या रस्त्यांपैकी भाग निहाय रस्त्याचे खडीकरण केलेले आहे.

माऊली चौक ते हुतात्मा चौक ते विश्वजित हॉटेल लांबी १५०० मी. या रस्त्याचे युटीलिटी शिफ्टींग तसेच खडीकरण काम सुरू आहे. शहरातील मुख्य वर्दळीचा रस्ता दसरा चौक ते इंदिरा सागर हॉटेल प्रथम प्राधान्याने करण्याचे नियोजन संबधित ठेकेदारास देण्यात आले आहे. या ५ रस्त्याची कामे ३० मे पुर्वी खडीकरण व डांबरीकरण पूर्ण करण्याबाबत संबंधित ठेकेदाराला निर्देशित करण्यात आलेले आहे.
आणखी दोन वर्षांची प्रतीक्षा
 

कामाची मुदत ही १८ महिन्यांची आहे म्हणजे एकूण काम पूर्ण होण्यास कोल्हापूरकरांना आणखी दोन वर्षांची प्रतीक्षा करणे भाग आहे. दि.१३.०५.२०२५ रोजी कामे पूर्ण होणार आहेत. या कालावधीत संबंधित ठेकेदाराकडून सदर वर्क ऑर्डरमध्ये नमुद संपूर्ण १६ रस्त्यांची कामे पूर्ण करणे संबधित ठेकेदाराला बंधनकारक राहणार आहे. अन्यथा संबधित ठेकेदारावर टेंडर शर्तीनुसार कारवाई करण्यात येणार आहे