बातम्या

जिममध्ये व्यायाम करताना या गोष्टी लक्षात ठेवा

By nisha patil - 6/21/2023 7:29:41 AM
Share This News:

व्यायाम हा निरोगी शरीरासाठी फायदेशीर मानला जात असतानाही, व्यायामशाळेत व्यायाम करताना हृदयविकाराने मृत्यूमुखी पडण्याच्या घटनांमध्ये वाढ होत आहे ही चिंतेची बाब आहे. प्रश्‍न असा आहे की, फिटनेसबाबत सजग असलेल्या लोकांमध्ये हृदयविकाराचा धोका का असतो?

हृदयविकाराचा झटका आणि व्यायाम यांचा काय संबंध? तुम्हीही फिट राहण्यासाठी जिममध्ये जात असाल किंवा वर्कआउट करत असाल तर खालील गोष्टींची विशेष काळजी घ्या.

कार्डिओलॉजिस्टचा सल्ला घेतल्यानंतरच तरुणांनी जिम जॉइन करावी. तरुणांना कोरोनरी आर्टरी डिसीज होऊ शकतो. त्यामुळे तुमच्या वयानुसार आणि शरीराच्या क्षमतेनुसार व्यायाम करा. आजकाल 22 वर्षांवरील बहुतेक तरुण बॉडी करण्यासाठी अतिव्यायाम करतात. शरीराच्या क्षमतेपेक्षा जास्त व्यायाम केल्यास हृदयविकाराचा धोका वाढू शकतो. म्हणूनच तुमच्या क्षमता ओळखा आणि केवळ प्रशिक्षक आणि डॉक्‍टरांच्या सल्ल्यानुसारच तुमच्यासाठी योग्य व्यायाम निवडा.

ज्या लोकांची नुकतीच हृदयाची शस्त्रक्रिया झाली आहे, त्यांनी जड व्यायाम करू नये. शस्त्रक्रियेनंतर, अशा लोकांना फक्‍त चालणे आवश्‍यक आहे. तज्ज्ञांच्या मते, तुम्ही हृदयशस्त्रक्रियेनंतर किमान 6 आठवड्यांनंतरच व्यायाम सुरू करू शकता, परंतु त्यासाठी आधी तुमच्या डॉक्‍टरांची परवानगी देखील घ्या. जर तुम्ही घरी किंवा जिममध्ये व्यायाम करत असाल तर आठवड्यातून 5-6 वेळा व्यायामासह 5-10 मिनिटे श्‍वासोच्छवासाचे व्यायाम करा. वर्कआउट करण्यापूर्वी पाच मिनिटे वॉर्म अप करा. त्यानंतर पाच मिनिटे कूलडाउन व्यायाम करा. त्यानंतरच कसरत सुरू करा.