बातम्या

संजय राऊतांच्या औरंगजेबाच्या टीकेला मोदींचं चोख प्रत्युतर; म्हणाले...

By nisha patil - 3/21/2024 5:39:49 PM
Share This News:

 मुंबई : लोकसभा निवडणुकांचं  बिगुल वाजलं असून सत्ताधारी आणि विरोधकांमध्ये आरोप-प्रत्यारोपांच्या फैरी झडत असल्याचं पाहायला मिळत आहे. अशात शिवसेना उद्धव बाळासाहेब ठाकरे  गटाचे खासदार संजय राऊत  यांनी दोन दिवसांपूर्वी एक वक्तव्य केलं होतं. संजय राऊतांनी देशाचे पंतप्रधान नरेंद्र मोदींची तुलना औरंगजेबाशी केली होती. संजय राऊतांच्या या टीकेवर आता खुद्द पंतप्रधान मोदींनी टिप्पणी केली आहे. मोदींनी वेगळ्या पद्धतीनं राऊतांच्या टीकेला उत्तर दिलं आहे. मोदींच्या टीकेवरुन राजकीय वर्तुळात चर्चांना उधाण आलं आहे. 
 

मोदी सरकार सध्या गेल्या दहा वर्षांचं रिपोर्ट कार्ड देशवासियांशी शेअर करत आहे. अशातच विरोधी पक्ष सातत्यानं पंतप्रधान मोदींवर टीका करत आहेत. मात्र, पंतप्रधान नरेंद्र मोदी विरोधी पक्षनेत्यांच्या या टीकेला आणि टिप्पण्यांना नेहमीच वेगळ्या पद्धतीनं उत्तर देतात. बुधवारी  पंतप्रधान मोदींनी एका खासगी टीव्ही वाहिनीला दिलेल्या मुलाखतीत त्यांनी विरोधकांवर निशाणा साधला.
 

  पंतप्रधान नरेंद्र मोदी पुढे म्हणाले, आज विरोधकांनी 104 व्यांदा मोदींना शिवीगाळ केली. औरंगजेब या नावानं माझा सन्मान केला. असं म्हणत मोदींनी संजय राऊतांना प्रत्युत्तर दिलं आहे. शिवसेना  नेते आणि राज्यसभा खासदार संजय राऊत म्हणाले होते की, औरंगजेबचा जन्म पीएम मोदींच्या गावाजवळ झाला होता. त्यामुळे दोघांची विचारसरणी सारखीच आहे. संजय राऊत यांच्या या वक्तव्यावर भाजप नेत्यांनी तीव्र आक्षेप घेतला होता. अशातच आता खुद्द मोदींनी राऊतांना प्रत्युत्तर दिलं आहे
 

सरकार आपल्या दहा वर्षांच्या कामाचे रिपोर्ट कार्ड ठेवत आहे. आम्ही पुढील 25 वर्षांचा रोडमॅप बनवत आहोत आणि आमच्या तिसऱ्या कार्यकाळातील पहिल्या 100 दिवसांचा आराखडाही तयार करत आहोत. दुसरीकडे आमचे विरोधक आहेत. ते नवनवीन विक्रमही करत आहे. आज त्यांनीच दहावी शिवी मोदींना दिली. औरंगजेब म्हणून मला सन्मानित केलं.