बातम्या

करवीरमधून संताजी घोरपडे यांचा जनसुराज्यतर्फे उमेदवारी अर्ज दाखल...

By nisha patil - 10/26/2024 4:10:47 PM
Share This News:

करवीरमधून संताजी घोरपडे यांचा जनसुराज्यतर्फे उमेदवारी अर्ज दाखल...

करवीर विधानसभा मतदारसंघातून जनसुराज्य शक्ती पक्षाचे उमेदवार संताजी घोरपडे यांनी आज आमदार विनय कोरे यांच्या उपस्थितीत उमेदवारी अर्ज दाखल केला. अर्ज दाखल करण्याच्या या सोहळ्यात कोणतेही शक्तिप्रदर्शन टाळून, घोरपडे यांनी कोविड काळात व्हिजन ट्रस्टच्या कोविड सेंटरद्वारे मदत घेतलेल्या रुग्णांचा आशीर्वाद घेऊन अर्ज दाखल केला.

यावेळी बोलताना आमदार विनय कोरे म्हणाले, “महायुतीने आमच्या उमेदवारांचा विचार करावा अशी आम्ही मागणी करत आहोत. राज्यात महायुती आणि महाविकास आघाडीमध्ये जागावाटपाचा मोठा गोंधळ सुरू असताना, आम्ही आमच्या इच्छुक उमेदवारांचे अर्ज दाखल करत आहोत.” त्यांनी पुढे सांगितले की, संताजी घोरपडे यांनी मागील दोन अडीच वर्षे कृषी महोत्सव आणि कोविड काळातील समाजसेवा उपक्रमांद्वारे सामान्य जनतेपर्यंत पोहोचण्याचे मोलाचे कार्य केले आहे.

कोविड काळातील त्यांच्या कार्याची दखल घेत, व्हिजन ट्रस्टच्या कोविड सेंटरमधून मदत घेतलेल्या अनेक रुग्णांनी आज त्यांच्या अर्ज दाखल सोहळ्यात उपस्थित राहून त्यांना आशीर्वाद दिला.

करवीर विधानसभा मतदारसंघातील या अर्ज दाखल सोहळ्याला जनसुराज्य शक्ती पक्षाच्या कार्यकर्त्यांचा आणि नागरिकांचा उत्तम प्रतिसाद मिळाला.