शैक्षणिक

१० वी आणि १२ वीच्या विद्यार्थ्यांनी ग्रेस गुण अर्ज ‘आपले सरकार’ प्रणालीद्वारे भरावेत – जिल्हा क्रीडा अधिकारी

By nisha patil - 12/2/2025 6:27:01 PM
Share This News:

१० वी आणि १२ वीच्या विद्यार्थ्यांनी ग्रेस गुण अर्ज ‘आपले सरकार’ प्रणालीद्वारे भरावेत – जिल्हा क्रीडा अधिकारी

कोल्हापूर, दि. १२: इयत्ता १० वी आणि १२ वीच्या खेळाडू विद्यार्थ्यांचे ग्रेस गुण अर्ज यावर्षीपासून ‘आपले सरकार’ प्रणालीद्वारे केवळ ऑनलाईन स्वीकृत केले जातील, अशी माहिती जिल्हा क्रीडा अधिकारी नीलिमा अडसूळ यांनी दिली आहे.

ऑफलाइन प्रक्रियेऐवजी ऑनलाईन अर्ज अनिवार्य

सन २०२३-२४ पर्यंत ग्रेस गुण अर्ज ऑफलाईन पद्धतीने घेतले जात होते, मात्र त्यातील मानवी त्रुटींमुळे अनेक विद्यार्थ्यांना गुण मिळण्यात अडचणी येत होत्या. या समस्येचे निराकरण करण्यासाठी २०२४-२५ या वर्षापासून अर्ज प्रक्रिया पूर्णतः ऑनलाईन करण्यात आली आहे.

आपले सरकार पोर्टलद्वारे अर्ज करण्याची पद्धत

 सर्व अर्ज ‘आपले सरकार’ पोर्टलद्वारेच सादर करणे अनिवार्य असेल.
 जिल्हा, विभाग, राज्य व राष्ट्रीय स्पर्धेतील सहभाग अथवा प्राविण्यासाठी अर्ज फक्त ऑनलाईन भरावा लागेल.
शाळा आणि कनिष्ठ महाविद्यालयांनी विद्यार्थ्यांना ऑनलाईन अर्ज प्रक्रिया पूर्ण करण्यास मदत करावी.
 शिक्षण मंडळास अर्ज आपोआप पाठविला जाईल, त्यामुळे ऑफलाईन अर्ज स्वीकारले जाणार नाहीत.

जिल्हा क्रीडा अधिकारी कार्यालयासाठी नवीन लॉग-इन प्रणाली

पूर्वीच्या तीन लॉग-इन प्रणालीऐवजी यापुढे फक्त दोन लॉग-इनच वापरले जातील, तर तिसरे लॉग-इन महाराष्ट्र राज्य माध्यमिक व उच्च माध्यमिक शिक्षण मंडळ हाताळेल.

विद्यार्थी, पालक, शाळा आणि महाविद्यालयांनी ही नवीन प्रणाली वेळेत आणि अचूक रितीने वापरण्याची काळजी घ्यावी, असे आवाहन जिल्हा क्रीडा अधिकारी नीलिमा अडसूळ यांनी केले आहे.