बातम्या

अवघ्या पाच महिन्यांपूर्वी विवाह केलेल्या वनरक्षकाने गळ्याला दोरी लावून केला आयुष्याचा शेवट

By nisha patil - 8/17/2023 6:53:22 PM
Share This News:

शिराळामध्ये वनरक्षकाने गळफास घेत आत्महत्या केल्याची धक्कादायक घटना घडली. वनरक्षक प्रमोद पांडुरंग कोळी असे त्यांचे नाव आहे. प्रमोद यांचा अवघ्या पाच महिन्यांपूर्वी विवाह झाला होता. आत्महत्येचे कारण मात्र समजू शकलेलं नाही. प्रमोद यांच्या वडिलांचे सुद्धा निधन झाले असून, ते अनुकंपाखाली भरती झाले होते. त्यांच्या पश्चात आई, पत्नी, भाऊ असा परिवार आहे. श्रीराम कॉलनीमध्ये राहणारे चांदोलीतील वनरक्षक प्रमोद पांडुरंग कोळी यांच्या बेडरुममध्ये पंख्याला कडी होती. नायलॉन दोरीने गळफास लावून त्यांनी आत्महत्या केली. याबाबत घर मालक दयानंद घोडके यांनी फिर्याद दिली. 

शिराळा पोलिसांनी दिलेल्या माहितीनुसार प्रमोद कोळी हे चांदोलीत झोळंबी या ठिकाणी गेल्या दोन वर्षांपासून वनरक्षक म्हणून नोकरीस होते. श्रीराम कॉलनीत पाच महिन्यांपासून ते पत्नीसह राहत होते. सोमवारी रात्री आठनंतर ते बेडरुममध्ये काम करत बसले होते. त्यांची पत्नी प्रणाली बाजूच्या खोलीत झोपल्या होत्या. मंगळवारी सकाळी आठ वाजता प्रणाली या प्रमोद यांना उठवण्यासाठी गेल्या असता बेडरुमच्या दरवाजाला आतून बराच वेळ आवाज देऊन कडी काढली नाही. त्यामुळे घरमालक घोडके यांना माहिती दिली. त्यांनी शेजाऱ्यांच्या मदतीने दरवाजा फोडून काढला असता, आतमध्ये प्रमोद यांनी गळफास लावून आत्महत्या केल्याचे दिसून आले.