बातम्या

अर्थसंकल्प: देशाचा की बिहारचा? – शेतकरी आणि कामगारांसाठी काही नाही!

By nisha patil - 1/2/2025 10:55:10 PM
Share This News:

अर्थसंकल्प: देशाचा की बिहारचा? – शेतकरी आणि कामगारांसाठी काही नाही!

या वर्षीचा अर्थसंकल्प देशाच्या सर्वसामान्य लोकांपर्यंत पोहोचला की बिहारच्या धर्तीवर मांडला गेला, असा प्रश्न उपस्थित केला जात आहे. शेतकरी, कामगार आणि बेरोजगारांसाठी या अर्थसंकल्पात कोणतीही ठोस तरतुद नाही, फक्त जुमलेबाजीच्या घोषणा करण्यात आल्या आहेत.

किसान क्रेडिट कार्डची मर्यादा तीन लाखावरून पाच लाख करण्यात आली, पण त्याचा प्रत्यक्ष शेतकऱ्यांना काय फायदा झाला? खतांच्या किमती वाढत आहेत, महागाईने सर्वसामान्य माणसांचे जीवन कठीण केले आहे, परंतु या मुद्यांवर कोणतेही उत्तर अर्थसंकल्पात दिसत नाही. उलट, मनरेगाच्या निधीत कपात करून केंद्र सरकारने सर्वसामान्य लोकांना निराश केले आहे.

बेरोजगारीच्या वाढत्या समस्येवर किंवा महागाईच्या नियंत्रणावर काहीही ठोस उपाय योजना नाहीत. जरी सरकारने बारा लाखांपर्यंत उत्पन्न करमुक्त केले आहे, तरी बेरोजगारीमुळे लोकांना बारा लाख कसे कमवायचे, हा गंभीर प्रश्न आहे.

यातच, आरोग्य, शिक्षण, सामाजिक कल्याण आणि ग्रामीण विकासाच्या क्षेत्रात निधीची मोठी कपात केली आहे, ज्यामुळे ग्रामीण भागातील नागरिकांवर परिणाम होणार आहे. अल्पसंख्याकांच्या योजनांचे बजेट कमी केल्याने त्यांच्यासाठी अडचणी निर्माण होणार आहेत.

अंततः, या अर्थसंकल्पातून एक गोष्ट स्पष्ट झाली आहे - सरकार हा अर्थसंकल्प धनदांडग्यांसाठी बनवित आहे, सर्वसामान्य लोकांसाठी नाही.