विशेष बातम्या

गाड्यांसाठी तत्परता, पण जनतेच्या प्रश्नांकडे दुर्लक्ष – संजय पवार

By nisha patil - 3/28/2025 9:27:31 PM
Share This News:

गाड्यांसाठी तत्परता, पण जनतेच्या प्रश्नांकडे दुर्लक्ष – संजय पवार

कोल्हापूर – राज्याचे उपमुख्यमंत्री आणि वित्तमंत्री अजित पवार यांनी कोल्हापूर दौऱ्यात त्यांच्या ताफ्यातील गाड्यांच्या दर्जावर नाराजी व्यक्त करत प्रशासनाला तातडीने नवीन पाच गाड्यांचा प्रस्ताव सादर करण्याचे आदेश दिले. मात्र, कोल्हापूरच्या जनतेचे अनेक प्रश्न प्रलंबित असताना गाड्यांसाठी तातडीने निर्णय घेणाऱ्या दादांनी, जनतेच्या समस्यांवरही तितक्याच गांभीर्याने लक्ष द्यावे, अशी मागणी शिवसेना (उद्धव बाळासाहेब ठाकरे) पक्षाचे जिल्हाप्रमुख संजय पवार यांनी केली आहे.

जनतेच्या समस्यांकडे दुर्लक्ष का?

संजय पवार यांनी आपल्या निवेदनात स्पष्ट केले की, कोल्हापूर शहर आणि जिल्ह्यात अनेक महत्त्वाचे प्रकल्प प्रलंबित आहेत. परंतु, प्रशासन आणि सरकार त्याकडे दुर्लक्ष करत आहे.

कोल्हापूर महालक्ष्मी तीर्थक्षेत्र आराखड्यासाठी अद्याप निधी मिळालेला नाही.

शहरातील रस्त्यांची दुरवस्था, तुंबलेले गटारी आणि ओसंडून वाहणारे नाले यामुळे नागरिक त्रस्त आहेत.

झुम प्रकल्पाचा प्रश्‍न अद्याप सुटलेला नाही, आणि त्याचा परिणाम म्हणून अनेक रहिवाशांना दैनंदिन त्रास सहन करावा लागत आहे.

कंत्राटदारांना थकित देयके मिळत नसल्याने ते आत्महत्या करण्याच्या मानसिकतेत पोहोचले आहेत.

शाहू महाराज जन्मस्थळाच्या विकासासाठी कोणतीही ठोस पावले उचलली जात नाहीत.

गाड्या महत्त्वाच्या की जनतेचे प्रश्न?

संजय पवार यांनी स्पष्ट केले की, अजित पवार हे प्रशासनाला गाड्यांसाठी झापू शकतात, मग कोल्हापूरच्या ज्वलंत प्रश्नांसाठी त्यांनी प्रशासनाला खडसावले का नाही? कोल्हापूरसाठी महत्त्वाचे असलेल्या योजना आणि कामांसाठी राज्य सरकारने त्वरित निर्णय घ्यावा, अशी मागणी त्यांनी केली आहे.

"जनतेच्या प्रश्नांकडे डोळेझाक आणि गाड्यांसाठी तत्परता हा प्रशासनाचा आणि सरकारचा नवा कारभार असू शकत नाही. कोल्हापूरच्या समस्यांकडे गांभीर्याने लक्ष द्यावे आणि तातडीने ठोस उपाययोजना कराव्यात," असेही संजय पवार यांनी म्हटले.

- संजय पवार, उपनेते, जिल्हाप्रमुख (शिवसेना – उद्धव बाळासाहेब ठाकरे पक्ष)