बातम्या

हातकणंगलेत मिणचेकर यांची महाविकास आघाडीच्या वतीने उमेदवारी जाहीर होण्याची शक्यता

By nisha patil - 10/21/2024 3:56:00 PM
Share This News:

हातकणंगले विधानसभा मतदारसंघात महाविकास आघाडीच्या उमेदवारीसाठी माजी आमदार डॉ. सुजित मिणचेकर यांचे नाव पुढे येत आहे. उद्धव ठाकरे गटाला ही जागा मिळण्याची शक्यता असल्याने विद्यमान आमदार राजू बाबा आवळे यांची प्रतिक्रिया काय असेल, याकडे सर्वांचे लक्ष लागले आहे.

दसऱ्यानंतर, उमेदवारी अर्ज भरण्याच्या दोन दिवस अगोदर माजी आमदार आणि गोकुळचे संचालक डॉ. सुजित मिणचेकर यांनी मातोश्रीवर जाऊन पक्षाध्यक्ष उद्धव ठाकरे यांची भेट घेतली. दसऱ्यानिमित्त आपट्याची पाने देऊन आशीर्वाद घेतल्यावर, माजी मुख्यमंत्री उद्धव ठाकरे यांनी डॉ. मिणचेकर यांना आगामी विधानसभा निवडणुकीसाठी लढण्याची परवानगी दिल्याचे समजते. "तुम्ही प्रचाराच्या तयारीला लागा," असा आदेश त्यांनी दिला आहे.

यामुळे डॉ. सुजित मिणचेकर यांची महाविकास आघाडीच्या वतीने उद्धव बाळासाहेब ठाकरे गटाचे उमेदवार म्हणून निवड निश्‍चित झाल्याचे मानले जात आहे. या भेटीदरम्यान माजी खासदार संजय राऊतही उपस्थित होते, ज्यामुळे ही उमेदवारी अधिकृत होण्याची शक्यता वाढली आहे.