बातम्या

तरुणाईचा निर्धार जलयुक्त शिवार: एनएसएसचे माले येथे विशेष श्रमसंस्कार शिबिर संपन्न

By nisha patil - 1/2/2025 11:00:57 PM
Share This News:

तरुणाईचा निर्धार जलयुक्त शिवार: एनएसएसचे माले येथे विशेष श्रमसंस्कार शिबिर संपन्न

कोल्हापूर: डी. के. ए. एस. सी. कॉलेज, इचलकरंजीच्या राष्ट्रीय सेवा योजना विभागाने माले येथे २१ ते २७ जानेवारी २०२५ या दरम्यान आयोजित केलेल्या विशेष श्रमसंस्कार शिबिरामध्ये १०० एनएसएस स्वयंसेवकांनी जलयुक्त शिवार या उद्दिष्टाने महत्त्वपूर्ण काम केले. शिबिराच्या दरम्यान, स्वयंसेवकांनी सिद्धोबाच्या डोंगरावर पाणलोट क्षेत्र व्यवस्थापनाचे शाश्वत कार्य केले.

यामध्ये, शास्त्रीय पद्धतीने डोंगराचा उतार मोजून गावाची भूजल पातळी वाढवण्यासाठी समतोल चर खोदण्याचे कार्य करण्यात आले. २ हेक्टर क्षेत्रामध्ये १००० मीटर लांबीच्या समतोल चर खोदून पावसाळ्यात २० दिवस पाऊस पडल्यास ३ कोटी ५६ लाख ४ हजार लिटर पाणी भूगर्भात मुरेल, अशी जलसाठवण क्षमता निर्माण केली गेली आहे.

याशिवाय, ओढ्यामध्ये २५ दगडी अनगड (बांध) घालण्यात आले, जे पाझर तलावामध्ये येणारा मातीचा गाळ थांबवण्यासाठी महत्त्वपूर्ण ठरले. या कार्यासाठी खर्चाचे अंदाजे ६ ते ८ लाख रुपये असून, एनएसएस स्वयंसेवकांनी हे सर्व विना मोबदला केले.

या शिबिराच्या उद्घाटनावेळी मा. आमदार अशोकराव माने आणि शिवाजी विद्यापीठ मॅनेजमेंट कौन्सिल राज्यपाल नियुक्त सदस्य सिद्धार्थ शिंदे यांच्याकडून विद्यार्थ्यांना पाणलोट क्षेत्र व्यवस्थापनावर मार्गदर्शन केले गेले. शिबिरामध्ये विविध विषयांवर व्याख्याने आणि मार्गदर्शन सत्रे आयोजित केली गेली, ज्यात प्लास्टिक मुक्त गाव, पर्यावरण, प्रदूषण, आणि राष्ट्रीय सेवा योजनेचे महत्त्व यासारख्या मुद्द्यांचा समावेश होता.

शिबिराच्या शेवटी, मा. आमदार अमल महाडिक यांनी प्रत्यक्ष कामाच्या ठिकाणी भेट देऊन विद्यार्थ्यांना मार्गदर्शन केले. शिबिरातील काम शाश्वत टिकणारे असून, ते नवीन पिढीला प्रेरणा देणारे ठरेल, असे सर्वांनी गौरवोद्गार काढले.

या शिबिराची व्यवस्था आणि जबाबदारी प्रा. वैशाली ढोबळे, डॉ. अनिल जांभळे, प्रा. अंकुश कुरणे आणि इतर स्वयंसेवकांनी उत्कृष्टरित्या पार पाडली.