बातम्या

महावितरणची जय्यत तयारी, गणपती विसर्जन मिरवणूक मार्गावर तैनात पथके*

By Administrator - 9/17/2024 2:48:10 PM
Share This News:

कोल्हापूर :गणेशोत्सवाच्या विसर्जन मिरवणुकीसाठी महावितरणने जय्यत तयारी केली आहे. विसर्जन मिरवणुकीच्या मार्गावर कोणत्याही प्रकारच्या विजेच्या समस्यांना तातडीने प्रतिसाद देण्यासाठी विशेष पथके तैनात करण्यात आली आहेत. या कामासाठी ३५ अधिकारी आणि १४० कर्मचारी यांची नेमणूक करण्यात आली आहे.

मिरवणुकीपूर्वी मुख्य अभियंता स्वप्नील काटकर आणि अधीक्षक अभियंता गणपत लटपटे यांनी यंत्रणेची पाहणी केली. त्यांनी स्थानिक यंत्रणांची माहिती घेतली आणि उपस्थित अधिकाऱ्यांना आवश्यक त्या सूचना दिल्या. त्यांनी मिरवणुकीदरम्यान कोणताही वीजपुरवठा खंडित होऊ नये याची काळजी घेण्यास तसेच कोणत्याही अडचणींवर तात्काळ उपाययोजना करण्याचे निर्देश दिले.

महावितरणच्या या पथकांकडून वीजपुरवठा सुरळीत राहावा यासाठी विविध उपाययोजना केल्या जात आहेत. मिरवणुकीदरम्यान कोणताही अनपेक्षित वीजपुरवठा खंडित होऊ नये, यासाठी सतत निरीक्षण करण्यात येईल. विजेच्या तारा, खांब किंवा इतर कोणत्याही विद्युत समस्यांवर त्वरित कारवाई करण्याची जबाबदारी या पथकांवर सोपवण्यात आली आहे.

सुरक्षिततेसाठी महावितरणच्या तांत्रिक पथकांकडून सतत गस्त घालण्यात येत आहे, तसेच विविध ठिकाणी वीजपुरवठा सुरळीत ठेवण्यासाठी तांत्रिक उपाययोजना तयार ठेवण्यात आल्या आहेत.