राजकीय

भाजप महिला मोर्चा प्रदेश उपाध्यक्षपदी शौमिका महाडिक यांची निवड

By Administrator - 5/30/2023 8:02:12 PM
Share This News:

कोल्हापूर जिल्हा परिषदेच्या माजी अध्यक्षा आणि गोकुळच्या विद्यमान संचालक शौमिका महाडिक यांची भाजप महिला मोर्चाच्या प्रदेश उपाध्यक्षपदी नियुक्ती करण्यात आली आहे. यापूर्वी त्यांनी मागील 3 वर्षे भाजप महिला मोर्चा कोल्हापूर जिल्हाध्यक्ष म्हणून काम पाहिले आहे. राज्य कार्यकारिणीत कोल्हापुरातून निवड होणाऱ्या त्या एकमेव महिला पदाधिकारी आहेत. भाजप महिला मोर्चा प्रदेशाध्यक्ष चित्रा वाघ यांनी याबाबतची घोषणा केली.

आपल्या आक्रमक शैलीने विरोधकांना नामोहरम करणाऱ्या शौमिका महाडिक यांनी कोल्हापूरच्या राजकारणात वेगळा ठसा उमटवला आहे. भाजपच्या कोल्हापूर जिल्ह्यातील धडाडीच्या महिला नेत्या म्हणून त्यांची ओळख आहे. गोकुळ मध्ये सुरू असलेल्या गैरकारभाराला वेळोवेळी वाचा फोडण्याचे काम शौमिका महाडिक यांनी केले आहे.

नुकत्याच झालेल्या राजाराम कारखाना निवडणुकीत महाडिक यांनी विरोधकांचा खरपूस समाचार घेतला त्यांच्या प्रश्नांची उत्तरे देताना विरोधक निरुत्तर झाल्याचे चित्र होते. त्यांच्या निवडीमुळे कोल्हापूरचा बुलंद आवाज आता राज्यभर गाजणार अशी चर्चा आहे.